Header Ads

الإيراد المقدم والإيراد المستحق

في الأول لازم نعرف يعنى ايه إيراد
الإيراد: هو اى فلوس بتاخدها (بتحصلها او بتجيلك) مقابل بضاعة بعتها او خدمة ادتها او مقاولة نفذتها او منحة خدتها.
زى ايه
1- المبيعات: ودي عبارة عن الفلوس اللى خدتها مقابل بضاعتى اللى بعتها يعنى(الفلوس اللى بتجيلى من النشاط  بتاعى)
2 –الفوائد الدائنة: الفلوس اللى بتدهالى البنوك مقابل الودايع اللى بحطها عندهم.
3- ارباح راسمالية : اى فلوس بتجيلى مقابل بيع اى اصل من اصول الشركة بقيمة اكبر من قيمته (يعنى لو عندى قيمة الاصل فى دفاتر الشركة 15000 وبعته ب17000 يبقى انا عندى ارباح راسمالية ب2000 ج ولكن لو بعته باقل من قيمته تبقى خسارة راسمالية)
طب يعنى ايه بقى ايراد مقدم او ايراد مستحق :
 1- الايراد مقدم :  دى فلوس انا خدتها (حصلتها او جاتلى ) ولسه مقدمتش الخدمة مقابل الفلوس اللى خدتها دى
زى ايه ؟
ايجار مقدم : انا عندى مبنى و باجر دور كامل لشركة (الشركة بتدفعلى فلوس الايجار فى بداية الشهر يعنى انا بستفيد بالفلوس قبل ما بدى الخدمة اللى هو الايجار فبالنسبالى انا باخد الفلوس مقدما قبل ما بدى الخدمة )
 2- الايراد المستحق :  دى خدمة انا قدمتها ولسة مخدتش فلوس مقابل الخدمة دى (يعنى مستحقلى فلوس عند اللى انا اديتله الخدمة دى ولسة مخدتهاش)
زى ايه ؟
عائد الودائع : انا بحط فلوسى في البنك في شكل وديعة (يعنى مبسحبش منها خالص ) فدى بتعتبر خدمة منى للبنك ياخد فلوسى ويشتغل بيها براحته ومقابل الخدمة دى بيديلى عائد فمثلا العائد ده 12000 ج سنويا يبقى 1000ج في السنة بس البنك بيقولى هديك فلوسك كل 3 شهور يعنى في اول شهر ابريل هديك فوائد (يناير وفبراير ومارس ) يعنى هيدينى 3000 ج يبقى انا المفروض في يناير ليا 1000ج حقى مقابل الخدمة اللى ادتها للبنك ولسة مخدتهوش ونفس الكلام فبراير ومارس لغاية ما اخد حقى في ابريل .

بعد ما شرحنا الايراد المقدم والمستحق؟ نيجى للسؤال الأهم، ايه موقف الايراد المقدم والمستحق بالنسبة للشركة؟! يعنى بيعتبروا أصول ولا خصوم ولا مصروف ولا ايراد؟

 أولاً الإيراد المقدم :  عكس المصروف المقدم، خدت فلوس ولسة مقدمتش خدمة مقابل الفلوس اللى خدتها دى فانا مديون بالفلوس اللى خدتها (يعنى هتفضل التزام عليا لحد ما أدى الخدمة) التزام يعنى بتعتبر خصم من خصوم الشركة.
 ثانياً الإيراد المستحق :  عكس المصروف المستحق، اديت خدمة ولسة مخدتش فلوس مقابل الخدمة دى يعنى انا مداين جهة معينة بخدمة لحد ما تسددلى قيمة الخدمة دى (يعنى ليا عندها فلوس) (فلوس ليا برة) فبتعتبر أصل من أصول الشركة. 

المعالجة المحاسبية :

 أولاً : المعالجة المحاسبية     لايراد المقدم : -
احنا قولنا ان ده فلوس انا خدتها ولسة مدتش الخدمة فالفلوس دى التزام عليا يعنى لما بتظهر الحالة دى (بيظهر التزام جديد يعنى خصم بيزيد) بيبقى دائن طب الطرف المدين؟ الطرف المدين هو اللى خد الفلوس وزادت قيمته بالفلوس دى (طبعا اللى دخله الفلوس دى هو الخزنة او البنك) (يعنى أصل زاد علشان كدة مدين) ويبقى القيد:
من حـ / البنك او الخزنة (الأصل اللى زاد قيمته بالفلوس اللى خدتها)
الى حـ/ الايراد المقدم (الالتزام اللى زاد عليا لحد ما أدى الخدمة)
طب خلاص كدة؟!
لا طبعا لسة لما أقدم الخدمة اللى انا مطالب بيها للشخص اللى ادانى الفلوس وفى الحالة دى بقفل الالتزام اللى عليا (يعنى خصم بيقل يعنى بيبقى مدين) طب الطرف الدائن؟
انا دلوقتى قدمت خدمة فعلية مقابل الفلوس اللى خدتها فحققت ايراد فعلى فلوس مقابل خدمة (يعنى ايراد فعلى زاد يعنى دائن) ويبقى القيد:
من حـ / الايراد المقدم (الالتزام اللى قل)
الى حـ / الايراد الفعلى (اللى اتحقق لما قدمت الخدمة) (على حسب اسم الايراد ممكن يكون ايجار، أوراق مالية) 


 ثانياً
 : المعالجة المحاسبية     لايراد المستحق : -
احنا قولنا ان ده خدمة ادتها ولسة مخدتش فلوسها (يعنى فلوس ليا برة) (يعنى أصل جديد بيظهر يعنى أصل بيزيد يبقى مدين) طب الطرف الدائن؟ دلوقتى في خدمة فعلية قدمتها يعنى ايراد فعلى ظهر (ايراد بيزيد يبقى دائن) ويبقى القيد:
من حـ / الايراد المستحق (الأصل اللى زاد عندى) (على حسب اسم الايراد ممكن يكون فوائد دائنة، إعلانات ودعاية)
الى حـ / الايراد الفعلى (الايراد اللى زاد بالخدمة اللى انا قدمتها)
طب خلاص كدة؟!
لا طبعا لسة لما اخد فلوس الخدمة اللى انا ادتها وقدمتها ساعتها يبقى الطرف المدين هو الل دخله الفلوس وزودت قيمته (الل هو البنك او الخزنة) (اصل زاد يبقى مدين)
طب الطرف الدائن؟ الطرف الدائن هو الأصل التانى اللى قل قيمته (اللى هو الايراد المستحق) علشان خلاص مبقاش مستحق وخدت فلوسه فيبقى هو الدائن ويبقى القيد:
من حـ / البنك او الخزنة (الأصل اللى زاد قيمته بالفلوس اللى خدتها)
الى حـ / الايراد المستحق(الأصل اللى قل عندى علشان خدت الفلوس ومبقاش مستحق) 


بعد ماشرحنا المعالجة المحاسبية في معلومة مهمة جدا جدا جدا، ايه هي؟

ان كل من (الايراد المقدم والايراد المستحق والمصروف المقدم والمصروف المستحق ) دى حسابات بتظهر في حالة الإيرادات والمصروفات اللى مش متعلقة بنشاط الشركة يعنى مصروفات وايرادات أخرى علشان الإيرادات المتعلقة بنشاط الشركة اسمها مبيعات وساعتها بيظهر حساب العملاء وده اللى بنرمى عليه (الاستحقاق والسداد ) يعنى البضاعة اللى بيعناها ولسة مخدناش فلوسها او الفلوس اللى خدناها مقدما ولسة مدناش البضاعة مقابلها ، والمصروفات المتعلقة بنشاط الشركة اسمها المشتريات وساعتها بيظهر حساب الموردين وده برده اللى بنرمى عليه (الاستحقاق والسداد برده) يعنى بضاعة اشترناها ولسة مسددناش فلوسها او فلوس دفعناها مقدما ومخدناش البضاعة لسة .


 • موضوع : المصروف المقدم والمستحق
الموضوع من إعداد المحاسب / أ . محمد محسن


هناك تعليقان (2):

  1. ولما يكون هناك ح/ ايراد مستحق وح/ ايراد مقدم ،فاين موقع ح/ العملاء من الاعراب كاستحقاق او دفعات مقدما

    ردحذف
  2. المثال الخاص بالايراد المقدم انك لو حصلت الايراد اول كل شهر يبقي ايراد مقدم عشان مقدمتش الخدمة مثال خاطىء بمعني لو ان العقد ينص علي تحصيل قيمة الايراد اول كل شهر اصبح ايراد يخص الشهر وايضا لو تم تحصيلة خلال الشهر او اخر الشهر فهو ايجار يخص الشهر اما في حاله تحصيل الايراد الخاص بشهور تالية للشهر فهذا هو الايراد المقدم المرتبط بعقد الايجار

    ردحذف

ملحوظة: يمكن لأعضاء المدونة فقط إرسال تعليق.

يتم التشغيل بواسطة Blogger.